Autoriteti Rregullator i Shërbimeve të Ujit (ARRU), në përputhje me Ligjin Nr. 05/L-042 për Rregullimin e Shërbimeve të Ujit dhe Rregulloren Nr. 16/2025 për Licencimin dhe Kushtet e Licencës për Ofruesit e Shërbimeve të Ujit, rregullon dhe administron procesin e licencimit të ofruesve të shërbimeve të ujit në Republikën e Kosovës. Licencimi paraqet mekanizmin themelor për sigurimin e një sektori të rregulluar, funksional dhe të qëndrueshëm të shërbimeve të ujit, duke garantuar që ofruesit e shërbimeve të operojnë në përputhje me kërkesat ligjore, standardet teknike, kapacitetet profesionale dhe qëndrueshmërinë financiare të nevojshme për ofrimin e shërbimeve publike.

Nëpërmjet procesit të licencimit, ARRU siguron trajtim të barabartë dhe transparent për të gjithë aplikuesit, si dhe krijon kushte për ofrimin e shërbimeve cilësore, të sigurta dhe të besueshme për konsumatorët. Licencat lëshohen për kategori të përcaktuara të shërbimeve të ujit dhe për zona të caktuara të shërbimit, duke përcaktuar qartë të drejtat, obligimet dhe përgjegjësitë e ofruesve të shërbimit të licencuar. Gjatë gjithë kohëzgjatjes së licencës, ARRU monitoron dhe mbikëqyr
zbatimin e kushteve të licencës dhe të standardeve të shërbimit, me qëllim përmirësimin e vazhdueshëm të performancës së sektorit dhe mbrojtjen e interesit publik, shëndetit të konsumatorëve dhe mjedisit.

(Shënim: Procedurat, kriteret dhe dokumentacioni i nevojshëm për aplikim në licencë janë të përcaktuara në legjislacionin në fuqi, përfshirë Rregulloren Nr. 16/2025. Formularët e aplikimit për licencë dhe lista e dokumenteve të kërkuara janë të disponueshme në uebfaqen zyrtare të ARRU-së.)